तुझ्यावर ?.. कविता ?..
सोप्पंय !..
तू म्हणजे एक फूल आहेस
चाफ्याचं.. किंवा गुलाबाचं..
किंवा त्याहीपेक्षा श्रेष्ठ !
ज्याचा शोधही लागला नाहीये असं..
तुझा एक मोहवणारा सुगंध आहे
मोगऱ्यासारखा.. किंवा रातराणीसारखा..
किंवा त्याहीपेक्षा श्रेष्ठ !
ज्याचा शोधही लागला नाहीये असा..
तुझा एक अप्रतिम रंग आहे
ऑर्चिडसारखा.. किंवा ट्युलिपसारखा..
किंवा त्याहीपेक्षा श्रेष्ठ !
ज्याचा शोधही लागला नाहीये असा..
तू म्हणजे..
...
...
...
शब्द हरवले वाटतं..
विचार हरवले कदाचित..
मीच हरवलो बहुतेक
तुझ्यावर कविता करण्याच्या नादात !..
..
..
कविता ?.. तुझ्यावर ?..
कविता फुलावर करता येईल गं..
वसंतावर नाही !..